2017/07/20

Bermeoko 18 eta 35 urte bitarteko gazteei Alde Zaharrean etxebizitzen alokairua ordaintzen lagunduko deutsie Udalak


Bermeoko Udalak Alde Zaharrean etxebizitzen alokairua ordaintzen laguntzeko diru-laguntzak emongo deutsiez Bermeon erroldatuta dagozan 18 eta 35 urte bitarteko gazteei.

Diru-laguntza horreek hainbat helburu dabez: gazteei emantzipazino bidean laguntzea eta, era berean, Alde Zaharrera erakarrita. Ganera, etxe hutsak merkaturatu gura dira, herriko Alde Zaharra bizibarritzeko helburuagaz.

Alde Zaharrean alokatzeko diru-laguntzak jaso gura dabezan gazteek 2017 amaitu arte eskariak aurkeztu ahal izango dabez Berhaz bulegoan. Eskatzaileek 18 eta 35 urte bitartean izan behar dabez, eta etxebizitza bakarrik, bikotekideagaz edota beste pertsona batzuekaz alokatu ahal izango dabe. Etxebizitza partekatzen daben gazte guztiak izan daitekez diru-laguntzaren onuradun, alokatze kontratua guztiek sinatu eta gainontzeko beste baldintza guztiak betetzen badabez. Alokairuak, gitxienez, urtebeteko iraupena izango beharko dau.

Diru-laguntzei jagokenez, eskatzaileen diru sarreren araberakoak izango dira, hau da, hileko alokairuaren prezioaren %50 izango da, eta, gehienez, 200 eurokoa. Deialdi horren kontura jaso daitekeen diru laguntza 2017ko errentari jagokona izango da.

2017/07/18

14 eta 29 urte bitarteko gaztea bazara atara eizu Gazte Txartela eta gozatu eizu daukazan abantaila guztiekaz


Euskadin bizi diran 14 eta 29 urte bitarteko gazteek atara ahal dabe Gazte-txartela. Ez dauka finantza zerbitzurik eta lortu ahal izateko ez da kontu korronterik zabaldu edo izan behar aurrezki kutxan. Internet bidez bakarrik lortu daiteke.

Gazteei zuzendutako beste txartelak ez bezala, Gazte Txartela Europan homologatuta dagoan gazte-txartel bakarra da, European Youth Card Association (EYCA) alkartearen barne baitago. Holan ba, Gazte Txartelaren titularrek, txartelak eskaintzen dauzan abantailaz baliatzeko aukera izateaz ganera, beste ganerako Autonomia Erkidegoetako eta EYCAko kide diran Europako 38 herrialdeetako gazte-txartelen abantailak be badaukiez.

Gazte-txartelak 6 euroko igortze-tasa dauka eta titularrak 30 urte betetzen dauzan egunean iraungiko da.

Gazte-txartelak deskontu iraunkorrak (garraioak, ostatua, prestakuntza, kultura, kirolak, osasuna, turismoa, e.a.), lehiaketak eta zozketak, bidaia-asegurua, ikuskizunetarako sarrerak, teknologia eta askoz gehiago eskaintzen dau. Gazte-txartela aurkezteagaitik bakarrik, gazteei deskontuak eskaintzen deutsiezan 2.000tik gora establezimendu dagoz Euskal Autonomia Erkidegoan bakarrik. Ikusi hemen Euskadiko abantailak, udalerriaren edo sektorearen arabera.

Zelan lortu Gazte-Txartela
Gazte-Txartela eskuratzea oso erraza da, hona hemen txartel hori lortzeko bidea:
Ordainketa egin ostean, astebete bi inguruko epean jasoko dozu txartela etxean.

2017/07/11

Bermeoko GIZek aisialdiko begiralea izateko ikastaroa antolatu dau eta izena emoteko epea zabalik dago jada

Aisialdiko begiralea edo monitorea izateko ikastaroa antolatu dau Bermeoko GIZek, hamargarren urtez jarraian, Gaztetxo Eskolagaz batera. Ikastaro hori, 2017ko urriaren 14tik 2018ko apirilaren 21era arte izango da, 12 asteburutan. Izen-emotea urriaren 6ra arte edo plaza kopurua bete arte egongo da zabalik, GIZen (Gizarte eta Kultura Etxea).

Eskolak, bariku atsaldeetan (18:30-21:00) eta zapatuetan (10:00-13:15/16:00-19:15) izango dira, Bermeoko Gizarte eta Kultura Etxean. Derrigorrezkoa izango da 12 saioetara joatea, izan be, baten batera falta izanez gero, datorren ikasturtean errekuperatu beharko da.

Titulazino ofiziala
Ikastaroaren atal teorikoak 150 orduko iraupena izango dau, aurreko urteetan baino 50 ordu gitxiago. Atal hori amaitutakoan memoria teorikoa entregatu beharko da. Ondoren, ikasleek 160 orduko praktikak egin beharko dabez, beti Gaztetxo Eskolak ipinitako epearen barruan edo Eusko Jaurlaritzak titulazinoa ofiziala lortzeko muga bezala ezarritako epearen barruan. Praktika horreek Udalaren gazteria zerbitzuetan egiteko aukera egongo da (Gaztelekua eta Ludoteka), lekua egonez gero. Bestela, Gaztetxo Eskolagaz edo norberan kabuz burutu beharko dira. Begirale praktikak amaitu eta gero, praktiken memoria garatu beharko da. Memoria praktiko hori atal praktikoa amaitutakoan entregatu beharko da.

Eusko Jaurlaritzaren Aisialdiko Begirale titulua lortzeko, beraz, ikasturtearen 12 ikastaro edo saioetan parte hartzeaz ganera, aipatutako memoria biak entregatu eta praktikak garatu beharko dira.

Plaza mugatuak
Ikastaroak 20 lagunentzako lekua dauka, gehienez. Ikasleek, Eusko Jaurlaritzako dekretuan agertzen dan moduan, 18 urte izan beharko dabez begirale praktikak gauzatzeko edota atal teorikoa amaitzen danerako. Hau da, 2018ko ekainaren 30erako 18 urte beteta izan behar dabez, izan be, derrigorrezkoa da 18 urte beteta izatea titulua tramitatzeko.

Izena-emoterakoan eta taldea osotzerakoan, 35 urtera arteko gazte bermeotarrek lehentasuna eukiko dabe. Ikasleak euskaldunak izan beharko dira, ikastaroa euskeraz izango baita.

Ikastaroaren edukiak, besteak beste, honako honeek izango dira: aisialdi heziketa, aisialdiko kudeaketa, aisialdiko dinamizazinoa, balioen hezkuntza, hezkuntza premia bereziak, herri nortasuna, droga-mendekotasunaren eta sexualidadearen prebentzinoa, e.a.

Matrikularen barruan aterpetxeetako hiru asteburuak (mantenu osoa) sartuta egongo dira.

2017/07/10

Gazteei bideratutako ekintzak zein aisialdiko ekintza bereziak finantzatzeko 2017ko diru-laguntzak eskatzeko epea ireki da


Uztailaren 5ean argitaratu dira BAOn, Bizkaiko Aldizkari Ofizialean, Bermeoko Udalaren 2017ko diru-laguntzen Udal Plan Estrategikoa eta diru-laguntzak arautzeko oinarri bereziak. Horreen barruan, "gazteei bideratutako ekintzak zein aisialdiko ekintza bereziak finantzatzeko diru-laguntzen deialdiaren oinarri espezifikoak" argitaratu dira.

Diru-laguntza horreen helburua, irabazi asmo bako herriko alkarteei eta bestelako pertsona juridikoei baliabide ekonomikoak emotea da herri mailan gazteei bideratutako jarduerak zein aisialdiko ekintza bereziak finantzatzeko, beti be, udaleko kultur eta jai jarduerak osotzen edo ordezkatzen dabezanean. Aurrekontuan zehaztutako diru-kopurua 2.000 eurokoa da.

Oinarri berezi horreetan xedatzen diran diru-laguntzak edozein pertsona juridikok eskatu ahal izango dauz, baldin eta honako baldintza honeek beteten badauz:

• Irabazi asmo bakoa izatea.
• Eusko Jaurlaritzako Elkarteen Erregistroan sartuta egotea.
• Egoitza Bermeon eukitea eta jarduera nagusia Bermeon garatzea. Egoitza Bermeotik kanpo izanez gero, ekintza bat Bermeon proposaturik eta interesgarritzat jotzen bada, aztertu egingo litzateke.
• Bermeoko Udalak aurretik emondako diru-laguntzen justifikazinoak behar diran moduan eta egunean izatea.
• Diru-laguntza eskatzen dan egunean tokiko zerga zorrak ordainduta izatea eta betebehar fiskaletan eta Gizarte Segurantzan egunean egotea. Bermeoko Udalak ziurtatuko dau puntu hau.

Diru-laguntza eskariak, behar bezala beteta eta behean adierazoten diran dokumentuekaz batera aurkeztuko dira, I. eranskinari jarraiki. Diru-laguntza eskariak aurkezteko epea 21 egun naturalekoa da, oinarriak BAOn argitaratu eta hurrengo egunetik zenbatzen hasita. Diru-laguntza eskaerak udaleko erregistro orokorrean, Berh@z bulegoan (Ertzilla kalea 6), aurkeztu beharko dira.


Eskariagaz batera, honako dokumentu honeek aurkeztu beharko dira:

 IFKren fotokopia konpultsatua (aldez aurretik aurkeztu ez bada).
 Alkartearen estatutuen fotokopia konpultsatuak eta zuzendaritza batzordeko kideen izendapena (aldez aurretik aurkeztu ez badira).
 Betebehar fiskaletan eta Gizarte Segurantzan egunean egotearen jatorrizko egiaztagiriak edo fotokopia konpultsatuak.
 Ekintzaren aurrekontu zehatza (I. eranskina), diru-sarrerak (kuotak, bestelako diru-laguntzak edo diru-iturriak), gastu guztien aurreikuspena eta Bermeoko Udalari egindako eskari zehatza adierazota.
 Alkarteak beste erakunde batzuei eskatutako diru-laguntzen zerrenda ordezkariaren ziurtagiriagaz. Eskaera horren erresoluzinoa egongo balitz, erabagiaren kopia.


Diru-laguntzaren justifikazinoa, bestalde, 2018ko urtarrilaren 31rako aurkeztu beharko da, II. eranskinari jarraiki.

2017/07/06

Aketz Zubia gazte bermeotarraren 'Kikuke' kartelak iragarriko dauz Bermeo​ko Andra Mari eta Santa Eufemia jaiak 2017

Argazkia: Busturialdeko Hitza
Bermeoko Jai Batzordeak deitutako 'Andra Mari eta Santa Eufemia' jaiak iragartzeko kartela aukeratzeko lehiaketara aurkeztu diran 9 lanen artean, Aketz Zubia gazte bermeotarrak egindako 'Kikuke' izenekoa izan da irabazlea.

Herritarrek euren botoekaz aukeratu dabe aurtengo Andra Mari eta Santa Eufemia jaien kartelaren irabazlea epaimahaiak aukeratu-tako bi kartel finalisten artean.

Bermeotarrek bai Gizarte eta Kultura Etxean jarritako kutxan bai internet bidez emon dabe botoa. Kutxan jasotako botoek %70eko balioa izan dabe eta internet bidez jasotakoek, barriz, %30a, eta Aketz Zubia bermeotarraren ‘Kikuke’ kartelak irabazi dau. 

Aurton 9 kartel aurkeztu dira lehiaketan. Epaimahaiak, Jai Batzordeko kideek, Udaleko zinegotziek eta Barrueta Arte Elkarteko kideek osotutakoa, horreen artean aukeratu ebezan kartel finalista biak eta herritarrek horreen artean aukeratu dabe irabazlea. Zubiak 600 euroko sario jasoko dau.

2017/06/21

Uda honetan Europara bidaiatzeko asmoa izanez gero, atara eizu hainbat arinen Europako Osasun Txartela



Alemania, Austria, Belgika, Bulgaria, Zipre, Danimarka, Eslovakia, Eslovenia, Estonia, Finlandia, Frantzia, Grezia, Hungaria, Irlanda, Islandia, Italia, Kroazia, Letonia, Liechtenstein, Lituania, Luxenburgo, Malta, Norvegia, Herbehereak, Polonia, Portugal, Erresuma Batua, Txekiar Errepublika, Suedia edo Suitzara bazoaz, ez ahaztu Europako Osasun Txartela.

TSE txartela banakakoa da eta titularrari osasun zerbitzuak jasotzeko eskubidea bermatzen deutso. Zerbitzu horreek Europako Batasuneko herrialdeetan, Europako Esparru Ekonomikoko herrialdeetan eta Suitzan jaso ahal izango dira. Horretarako, zerbitzuak eta herrialdean igaroko dan denbora hartuko dira kontuan.

Eskatzen daben pertsonei emongo jake txartela eta turismoko bidaietan, ikasketa edota pentsioarengaitik egiten diran leku aldaketetan erabili ahal izango da. Txartelean titularraren izena, NAN zenbakia eta atzetik daukan Segurtasun Sozialeko Institutuaren zenbakia agertuko dira. Horreri esker tramiteak asko arinduko dira, izan be, orain arte derrigorrezkoa zan gaixoa bere herrialdeko Segurtasun Sozialeko bulegoagaz hartu-emonetan jartzea.

Europako Osasun Txartelari esker, Europar Batasuneko hiritar guztiek jaso ahal izango dabe Batasuneko edozein herrialdetan osasun zerbitzua. Doako zerbitzua izango da hori, eta ordaindu behar baldin bada, ondoren egingo da hori. Txartelaren balioa urte bikoa da (txartelean bertan adierazoten da iraungitze-data).

Zelan eskuratu
 On line, Gizarte Segurantzaren Bulego Birtualean eskatzen badozu, etxean jasoko dozu txartela.
 Telefono bidez: 901 16 65 65 telefono zenbakira deitu eta etxean jasoko dozu txartela, egun gitxiren epean.
 Gizarte Segurantzaren bulegoetan: Bilbon: Avda. Sabino Arana, 3 - 944 284 545 - Vicente Garamendi, 6 - 944 333 003 - Iruña, 13 - 944 478 366 - Gran Vía, 89 - 944 284 517 eta Gernikan: Juan Calzada, 89 - 946 257 107

2017/06/02

Busturialdeko gazteria zerbitzuek Gaztedi Busturialdearen webgunea martxan jarri dabe, eskualdeko gazteentzat


Bermeoko eta Gernika-Lumoko udaletako Gazteria zerbitzuek eta Urremendi Landa Garapen Elkarteko Gazteria zerbitzuak www.gaztedibusturialdea.eus web-orrialdea jarri dabe martxan, Bizkaiko Foru Aldundiaren 'Udal Gaztedi' programaren barruan. Horretan, Gaztedi Busturialdea proiektuan lantzen dabezan lan ildoak batzen dira.

Enplegua, bekak, prestakuntza eta ekintzailetza dira lan arlo nagusiak eta horreetan eskaintzen dabenaren informazinoa batzen da webgune barrian. Ganera, ikastaro, berbaldi edo bestelakotan izena emoteko aukera be dago bertan.

Atariak, ganera, ikastaro, hitzaldi edo bestelakotan izena emoteko izapideak be errezten dauz, aukera emoten baitau izen-emotea bertan egiteko.

2017/06/01

Beharsarea Bermeoko eta Busturialdeko euskerazko lana bideratzeko Interneteko webgunea da, doakoa eta erreza



Euskeraz egiten daben tabernari, dendari, ume zaintzaile eta bestelako lanen eskaera gero eta handiagoa da gure eskualdeko herrietan. Eskaera horreri erantzuteko, Busturialdeko Gazteria eta Euskera zerbitzuek eta Behargintza Enplegu Zentroek Beharsarea.eus webguneagaz bat egin dabe.

Beharsarea.eus Bermeoko eta eskualdeko herritar guztien eskura dagoan euskerazko lana bideratzeko Interneteko web-orria da, dohainezkoa eta euskeraz egiten dan lana eskeini eta eskatzeko tresna erraz eta eraginkorra. Busturialdeko udalek eskaintzen daben zerbitzu barri honetan lan bila dabilzanak eta lana eskaintzen dabenak hartu-emonetan jartzeko bidea emoten da. Lan bila dabilzanek izena emon behar dabe atarian eta zein herritan gura daben lan egin adierazo eta beharra eskeintzen dabenek, ostera, lanaren ezaugarriak eta xehetasunak adierazoko dabez formulario baten bidez. Holan ba, alde bietako interesatuak hartu-emonetan jarri eta hortik aurrera bideratuko dabe euren lan-harremana.


Baliabide honegaz helburu bi betetzen dira: enplegua bultzatu eta euskeraren erabilera eta normalizazinoaren prozesua garatu. Beharsarea zerbitzu bat da eta erabiltzaileek baldintza bi baino ez dabez bete behar: lan-baldintza duinak eskeintzea eta beharra euskeraz egitea.

Interneteko atari honetan Beharsarea osotzen daben udalerri eta mankomunidade bakotxak bere gunea dauka, eta bakotxaren gunera sartzen garanean, jadanik argitaratuta dagozan iragarkiak ikusi daikeguz edo barriak sortu. Ganera, hasikera-orrialdetik bertatik be aukera daukagu Beharsarea osoan jendea zein lana bilatzeko argitaratu diran azken 7 iragarkiak ikusteko. 

Lanak zazpi kategoriatan sailkatuta egon arren (zaintzaileak, begiraleak, merkataritza, ostalaritza, eskola partikularrak, industria eta bestelakoak), lan-mota guztiak bideratzeko balio dau Beharsareak. Zentzu horretan, lan partzialak zein lan profesionalak eskeini eta eskatu daitekez zerbitzu honen bidez. 

2011n sortu zan Beharsarea Getxoko Euskara Zerbitzuak eta Egizu Euskara Elkarteak sustatuta. Urtez urte, gora egin dau hasikerako Beharsarea zana osotzen daben udalerri eta mankomunidadeen kopuruak: 2012an, 25 udalerri batu ziran; 2013an, 20 udalerri; eta, 2014an, 2 udalerri (Basauri eta Galdakao) eta eskualde bat (Busturialdea) batu jakozan ekimenari. Danatara, 68 udalerrik daukie erabilgarri gaur egun Beharsarea tresna. Alkarbidek -Bizkaiko Euskara Zerbitzuen Bilguneak- koordinatuta dago. 

Beraz, lana euskeraz egiteko jentea behar dabenek, edota euskalduna bazara eta lana bilatu gura dabenek, orain bidea daukie Interneten: www.beharsarea.eus.

2017/04/20

BERMESEX, Bermeoko Sexologia Orientazino Zerbitzua, barikuro eskaintzen da herriko Gizarte eta Kultura Etxean

Bermeoko Udalak sexualidadeari buruzko informazinoa eta orientazinoa emoteko BERMESEX zerbitzu publikoa, doakoa eta konfidentziala dauka martxan barikuro, 16:00etatik 17:30era.

Bermesex, Bermeoko Sexologia Orientazio Zerbitzua, Gizarte eta Kultura Etxean eskainiko da, bariku arratsaldero. Zerbitzuaren helburua da sexualidadearen eta sexuaren bizipenean modu onuragarriak eta mesedegarriak bilatzeko orientazinoa emotea.

Bermesex zerbitzuko adituak, hainbat gairi buruzko orientazinoa emoten dau bariku arratsaldero Bermeoko Gizarte eta Kultura Etxean, besteak beste: sexu bidez transmititutako gaixotasunak (STG), antisorgailuak, tabuak, sexu orientazinoa...

Bermesex zerbitzuaren bidez, herriko eta eskualdeko gazteei lagundu gura jake modu partikularrean ezagutu, onartu eta adierazo daitezan, holan, euren adineko beste gazte batzuekaz hartu-emonak izateko modu onuragarriena bilatzeko. Helburu hori lantzeko gazte, familiarteko eta profesionalakaz egiten da lan. Holan ba, zerbitzua gazteei, gazteen gurasoei eta gazteekaz lan egiten dabenei (irakasleak, hezitzaileak, begiraleak, e.a.) zuzenduta dago.

Aurrez-aurreko arreta zuzena barikuro eskaintzen da, 16:00etatik 17:30era, Bermeoko Gizarte eta Kultura Etxeko bigarren solairuan. Ganera, profesionalakaz koordinatzeko aukera be badago.

Orientazinoaren bidez, profesional ezbardinekaz eta familia kideekaz alkarlanean, ume, gazte, familia eta hezkuntza baliabideen arazoei urtenbideak topateko bideak hausnartuko dira, egoera bakotxean esku hartzeko modu, eragile eta ekintza egokienak aztertuz. Ganera, proposamen ezbardinak eraiki daitekez, esate baterako: sexu hezkuntza programak, guraso eskolak, profesionalentzako ikastaroak, berbaldiak, informazino kanpainak, e.a.

Teknologia barriek aholkularitza ekintzak burutzeko aukerak zabaldu dabez, besteak beste, sare sozialak, skype bidezko bideokonferentziak, txata, e.a. Holan ba, Bermesex zerbitzuak orientazinoa on-line eta telefonoz egiteko aukerak eskaintzen dauz, hain zuzen be:

  e-posta: bermesex@bermeo.eus
•  Telefonoa: 644 898 661 (Arreta orduetatik kanpo deituz gero, mezua itzi daikezu erantzungailuan, zure telefonoagaz, eta zugaz hartu-emonetan jarriko gara)
  Skype: orientazio.zerbitzua
  Facebook: Orienta Zerbitzua
  Twitter: @sexorienta 

2017/03/27

Busturialdeko gazteek eskualdeko enpresetan trebatuko dira 'Gaztedi Busturialdea Bekak 2017' programari esker


Eskualdeko gazteek bertoko enpresatan trebatzeko aukera dabe "Lana bilatzea, Lana da" programari eta Gaztedi Busturialdea egitasmoari esker, 2017 honetan eskainiko diran formazino beken bitartez. Busturialdeko hainbat udalek (Arratzu, Bermeo, Ereño, Forua, Gautegiz Arteaga, Gernika-Lumo, Kortezubi, Mendata, Morga, Mundaka eta Sukarrietako udalek) eta Bizkaiko Foru Aldundiko Behatokiak sustatuko dabez beka horreek, Lanbideren bitartez.

"Lana bilatzea, Lana da" programak urte asko daroaz Busturialdeko gazteen enplegua eta ekintzailetza sustatzen, trebakuntza eta garapen pertsonalaren bidez. 'Gaztedi Busturialdea Bekak' izeneko ekimena programa horren jardun-lerroetako bat da.

Bekek ikasitakoa praktikan jartzeko eta lehen lan esperientzia ordaindua izateko aukera eskainiko deutsie 25 urtetik beherako eskualdeko gazteei. 2014tik hona eskualdeko 20 bat gaztek burutu dabez euren praktikak Busturialdeko beste horrenbeste enpresatan eta euretariko asko, ganera, lanean geratu dira bekak amaitu ostean.

Bekadunak izango diran gazteek, gehienez sei hilabetez benetazko lan merkatura hurbiltzeko eta prestakuntza eta lana uztartzeko aukera izango dabe, hau da, eskualdeko enpresatan lanekoak ez diran praktikak egin ahal izango dabez.

Beka horreek eskuratzeko, interesatuta dagozan gazteek baldintza batzuk bete beharko dabez; batetik, langabetuek baino ezin izango dabe eskaria egin, eta, horreek, ganera, 18 eta 25 urte bitartekoak izan beharko dira. Horretaz ganera, Lanbiden izena emona euki beharko dabe. Ganera, daukien ikasketa-maila be egiaztatu behar izango dabe: Lanbide Heziketako goi edo erdi mailako gradua, kirol zein arteetako goi mailako titulua, profesionaltasun ziurtagiria edo unibertsidadeko diplomatura, lizentziatura edota gradua, kasuan kasu.

Baldintza horreetaz aparte, aurretiaz jarduera berean hiru hilabete baino gehiagoko lan-harremanik edo esperientzia profesionalik euki ez daben gazteak izan beharko dira beka eskaerak egin ahal izango dabenak.

Eskariak egiteko epea zabalik GIZen
'Gaztedi Busturialdea Bekak' programan parte hartu gura daben eskualdeko gazteek edota enpresek, Bermeoko Udalaren Gazteria Zerbitzuagaz hartu-emonetan jarri beharko dira 94 617 91 58 telefono zenbakira deituta edo GIZera hurbilduta (Gizarte eta Kultura Etxeko lehen solairuan).

Lehen bidarrez lan arloan esperientzia lortzea da Gaztedi Busturialdea Beken helburua, holan, lan merkatuan errezago sartzea ahalbidetuko deutsielarik. Ganera, parte hartzaileek tutoretza eta coaching-a be izango dabe euren garapenean eta prestakuntzan laguntzeko.