2018/05/23

Aritzatxu hondartzako kantina ustiatzeko deialdia egin dau Bermeoko Udalak eta epea maiatzaren 31ra arte egongo da zabalik


Bermeoko Udalak, Aritzatxu hondartzako kantinea ustiatzeko oinarriak onartu dauz eta deialdia zabaldu dau. Bermeon bizi diran 18 urtetik gorako pertsona euskaldun danek parte hartu ahal izango dabe ustiapen horretan. Eskariak aurkezteko epea maiatzaren 31ko eguerdiko 12ak arte egongo da zabalik.

Esleipena, 2018ko ekainaren 1etik irailaren 30era artekoa izango da, egun biak barne. Epe hori luzaezina izango da eta hori amaitu ostean, gunea lehengo egoeran itzi beharko da, garbi eta guneari kalterik sortu barik. Esleipenerako sistema zozketa izango da.

Interesa daukienek eskariak aurkeztu ahalko dabez Bermeoko BERH@Z bulegoan (Ertzilla kalea 6-8), astelehenetik barikura, 08:30etik 14:30era; martitzenetan eta eguenetan, 16:30etik 19:00etara eta zapatuetan, 10:00etatik 13:00era.

Aurkeztu beharreko dokumentazinoa:
- Instantzia.
- Eskaintzaileen NAN edo ENAren fotokopia.
- Ustiapena egiteko eukiko dauzan langileak.
- Kontratatzeko debekurik ez eukitea, udalean zigor-espedienterik edegita ez eukitea, eta zorrik ez izatearen zinpeko aitorpena.

Kantinea jentearentzako zabalik egongo da egunero, goizeko 10etatik iluntzeko 8etara, eta ezelan be ezingo da zabalik egon ordu horretatik aurrera. Kantinea, gehienez be, hilean egun bitan itxi ahalko da, horretarako aurretiaz udalak baimena emon badau. Halanda be, kantina itxita dagoan egunetan be komun publikoak garbitu beharko dira.

2018/05/22

Izen-abizenak euskal grafiaz idazteko “Izena duenak izana du” kanpaina martxan jarri dau Bermeoko Udalak

Euskerazko abizenak euskal grafiagaz idazteko ‘Izena duenak izana du’ sentsibilizazino kanpaina martxan jarri dau Bermeoko Udalak, UEMAren laguntzagaz, “munduan euskaldunek presentzia izateko”.

Bermeon oso zabalduta dagozan abizen asko idatzi daitekez euskeraz, adibidez: Atxikallende, Allika, Argiarro, Astiazaran, Etxebarria, Bulukua, Markaida, Erauzkin, Gabantxo… Helburua da euskal abizena modu ofizialean gaztelaniazko grafiaz idatzita daukanak pausua emotea eta epaitegian eskatzea aldaketa.

Aipatutako informazino-orrietan jasotzen danez, hiru pausu erraz emon behar dira abizenak euskal grafiaz idazteko. Holan, interesa daukan pertsona lehenik eta behin erregistro zibilera edo bake epaitegira joan behar da, eta abizena euskal grafiaz ipini gura dauala esan.

Emongo deutsoen eskaera orria bere datuekaz beteko dau eta honako agiri honeek eroan beharko dauz:
  • Nortasun Agiriaren fotokopia (adinez nagusia ez danak gurasoena eroan behar dau).
  • Hitzez hitzeko jaiotza ziurtagiria (epaitegian eskatzen da).
  • Errolda agiria (Udaletxean eskatzen da eta, adinez nagusia ez bada, gurasoena beharko dau).
  • Familia-liburuaren fotokopia (familia edo seme-alabak badaukaz).
  • Seme-alaben nortasun agiriaren fotokopiak, 16 urtetik gorakoak badira.
Horretaz ganera, izena edota abizena euskeraz zelan idatzi behar dan kontsultatzeko www.euskaltzaindia.eus webgunean bilatu ahal izango da informazino osotua.

Informazino-orriak udal zerbitzuetan (Berhaz, Behargintza, Liburutegia, Gizarte eta Kultura Etxea, Musika eskola, Kiroldegia eta Euskera Saila) eta Bake Epaitegian egongo dira, eta ikastetxeetara be zabaldu dira.

Bestalde, epaitegietan egiten diran beste tramite batzuk be euskeraz egin daitekez. Holan ba, epaitegian erregistratzen diran jaiotza, ezkontza eta heriotza-inskripzinoetan, euskera erabiltzeko aukera badago.

2018/04/09

Busturialdeko hamar gazte eskualdeko enpresetan trebatuko dira 'Gaztedi Busturialdea Bekak 2018' programari esker


Busturialdeko hamar gaztek eskualdeko enpresatan trebatzeko aukera izango dabe aurton be "Lana bilatzea, Lana da" programari eta Gaztedi Busturialdea egitasmoari esker, lanekoak ez diran formazino beken bitartez. Busturialdeko hainbat udalek eta Bizkaiko Foru Aldundiak sustatuko dabez beka horreek, Lanbideren bitartez.

Bekadunak izango diran gazteek, gehienez sei hilabetez benetazko lan merkatura hurbiltzeko eta prestakuntza eta lana uztartzeko aukera eukiko dabe, hau da, eskualdeko enpresatan lanekoak ez diran praktikak egin ahal izango dabez.

Beka horreek eskuratzeko interesa daukien gazteek baldintza batzuk bete beharko dabez:

• 18-25 urte izatea, biak barne (edo 30 urte baino gitxiago izatea, Gazte Bermea Sistema Nazionalean inskribatutako pertsonen kasuan).
• Lanbiden lan eskatzaile moduan agertzea.
• Lanbide Heziketako oinarrizko, erdi-mailako edo goi-mailako titulua, profesionaltasun ziurtagiria edo unibertsitate titulua (diplomatura, lizentziatura edo gradua) izatea.
• Jasotako prestakuntzagaz erlazino zuzena daukan hiru hilabetetik gorako lan-esperientzia ez izatea.
• Bizkaiko Foru Aldundiagaz batera 'Gaztedi Busturialdea' hitzarmena sinatu daben udalerrietako batetan erroldatuta egotea, hain zuzen be: Arratzu, Bermeo, Ereño, Forua, Gautegiz Arteaga, Gernika-Lumo, Kortezubi, Mendata, Morga, Mundaka eta Sukarrieta.

Bekaren zenbatekoa hilero 460 eurokoa izango da eta hilabete bakotxaren amaieran jasoko da. Bekadunari, ganera, Gizarte Segurantzaren Erregimen Orokorrean alta emongo jako, lanekoak ez diran praktiken kotizazino-kontuaren kodean.

Bekek ikasitakoa praktikan jartzeko eta lehen lan esperientzia ordaindua izateko aukera eskainiko deutsie eskualdeko gazteei. Parte hartzaileek, ganera, banakako tutoretza eta coaching-a izango dabe euren garapenean eta prestakuntzan laguntzeko asmoagaz.

2014tik hona eskualdeko 35 gaztek burutu dabez euren praktikak Busturialdeko beste horrenbeste enpresatan eta euretariko asko, ganera, lanean geratu dira bekak amaitu ostean.

Eskariak egiteko epea zabalik
'Gaztedi Busturialdea Bekak' programan parte hartu gura daben eskualdeko gazteek edota enpresek, Bermeoko Udalaren Gazteria Zerbitzuagaz hartu-emonetan jarri beharko dira 94 617 91 58 telefono zenbakira deituta edo GIZera hurbilduta (Gizarte eta Kultura Etxeko lehen solairuan). Gaztedi Busturialdearen webguneko 'Bekak' ataletik be egin daiteke eskaria.

Beken onuradunen hautaketa prozesua Lanbidegaz batera egingo da enpresak eskatutako profila oinarri hartuta.

Lehen bidarrez lan arloan esperientzia lortzea da Gaztedi Busturialdea beken helburua, holan, lan merkatuan errezago sartzea ahalbideratuz.

2018/03/05

Europara bidaiatuko badozu atara eizu Europako Osasun Txartela, Batasuneko edozein herrialdetan osasun zerbitzua izateko


Alemania, Austria, Belgika, Bulgaria, Zipre, Danimarka, Eslovakia, Eslovenia, Estonia, Finlandia, Frantzia, Grezia, Hungaria, Irlanda, Islandia, Italia, Kroazia, Letonia, Liechtenstein, Lituania, Luxenburgo, Malta, Norvegia, Herbehereak, Polonia, Portugal, Erresuma Batua, Txekiar Errepublika, Suedia edo Suitzara bazoaz, ez ahaztu Europako Osasun Txartela.

TSE txartela banakakoa da eta titularrari osasun zerbitzuak jasotzeko eskubidea bermatzen deutso. Zerbitzu horreek Europako Batasuneko herrialdeetan, Europako Esparru Ekonomikoko herrialdeetan eta Suitzan jaso ahal izango dira. Horretarako, zerbitzuak eta herrialdean igaroko dan denbora hartuko dira kontuan.

Eskatzen daben pertsonei emongo jake txartela eta turismoko bidaietan, ikasketa edota pentsioarengaitik egiten diran leku aldaketetan erabili ahal izango da. Txartelean titularraren izena, NAN zenbakia eta atzetik daukan Segurtasun Sozialeko Institutuaren zenbakia agertuko dira. Horreri esker tramiteak asko arinduko dira, izan be, orain arte derrigorrezkoa zan gaixoa bere herrialdeko Segurtasun Sozialeko bulegoagaz hartu-emonetan jartzea.

Europako Osasun Txartelari esker, Europar Batasuneko hiritar guztiek jaso ahal izango dabe Batasuneko edozein herrialdetan osasun zerbitzua. Doako zerbitzua izango da hori, eta ordaindu behar baldin bada, ondoren egingo da hori. Txartelaren balioa urte bikoa da (txartelean bertan adierazoten da iraungitze-data).

Zelan eskuratu?
• On line, Gizarte Segurantzaren Bulego Birtualean eskatzen badozu, etxean jasoko dozu txartela.
• Telefono bidez: 901 16 65 65 telefono zenbakira deitu eta etxean jasoko dozu txartela, egun gitxiren epean.
• Gizarte Segurantzaren bulegoetan: Bilbon: Avda. Sabino Arana, 3 - 944 284 545 - Vicente Garamendi, 6 - 944 333 003 - Iruña, 13 - 944 478 366 - Gran Vía, 89 - 944 284 517 eta Gernikan: Juan Calzada, 89 - 946 257 107

2018/02/02

Bariku arratsaldero eskaintzen da BERMESEX Bermeoko Sexologia Orientazino Zerbitzuaren aurrez-aurreko arreta zuzena


Bermeoko Udalak sexualidadeari buruzko informazinoa eta orientazinoa emoteko BERMESEX zerbitzu publikoa, doakoa eta konfidentziala emoten dau astero.

Bermesex, Bermeoko Sexologia Orientazio Zerbitzua, Bermeoko Gizarte eta Kultura Etxean eskaintzen da, barikuro. Zerbitzuaren helburua da sexualidadearen eta sexuaren bizipenean modu onuragarriak eta mesedegarriak bilatzeko orientazinoa emotea.

Bermesex zerbitzuko adituak, hainbat gairi buruzko orientazinoa emoten dau bariku arratsaldero Bermeoko Gizarte eta Kultura Etxean, besteak beste: sexu bidez transmititutako gaixotasunak (STG), antisorgailuak, tabuak, sexu orientazinoa...

Bermesex zerbitzuaren bidez, herriko eta eskualdeko gazteei lagundu gura jake modu partikularrean ezagutu, onartu eta adierazo daitezan, holan, euren adineko beste gazte batzuekaz hartu-emonak izateko modu onuragarriena bilatzeko. Helburu hori lantzeko gazte, familiarteko eta profesionalakaz egiten da lan. Holan ba, zerbitzua gazteei, gazteen gurasoei eta gazteekaz lan egiten dabenei (irakasleak, hezitzaileak, begiraleak, e.a.) zuzenduta dago.

Aurrez-aurreko arreta zuzena barikuro eskaintzen da, 16:00etatik 17:30era, Bermeoko Gizarte eta Kultura Etxeko bigarren solairuan. Ganera, profesionalakaz koordinatzeko aukera be badago.

Orientazinoaren bidez, profesional ezbardinekaz eta familia kideekaz alkarlanean, ume, gazte, familia eta hezkuntza baliabideen arazoei urtenbideak topateko bideak hausnartuko dira, egoera bakotxean esku hartzeko modu, eragile eta ekintza egokienak aztertuz. Ganera, proposamen ezbardinak eraiki daitekez, esate baterako: sexu hezkuntza programak, guraso eskolak, profesionalentzako ikastaroak, berbaldiak, informazino kanpainak, e.a.

Teknologia barriek aholkularitza ekintzak burutzeko aukerak zabaldu dabez, besteak beste, sare sozialak, skype bidezko bideokonferentziak, txata, e.a. Holan ba, Bermesex zerbitzuak orientazinoa on-line eta telefonoz egiteko aukerak eskaintzen dauz, hain zuzen be:

  e-posta: bermesex@bermeo.eus
•  Telefonoa: 644 898 661 (Arreta orduetatik kanpo deituz gero, mezua itzi daikezu erantzungailuan, zure telefonoagaz, eta zugaz hartu-emonetan jarriko gara)
  Skype: orientazio.zerbitzua
  Facebook: Orienta Zerbitzua
  Twitter: @sexorienta 

2018/01/16

14-29 urteko gaztea bazara eta Euskadin erroldatuta bazagoz atara eizu Gazte Txartela eta gozatu daukazan abantaila danakaz

Euskadin bizi diran 14 eta 29 urte bitarteko gazteek atara ahal dabe Gazte-txartela. Ez dauka finantza zerbitzurik eta lortu ahal izateko ez da kontu korronterik zabaldu edo izan behar aurrezki kutxan. Internet bidez bakarrik lortu daiteke.

Gazteei zuzendutako beste txartelak ez bezala, Gazte Txartela Europan homologatuta dagoan gazte-txartel bakarra da, European Youth Card Association (EYCA) alkartearen barne baitago. Holan ba, Gazte Txartelaren titularrek, txartelak eskaintzen dauzan abantailaz baliatzeko aukera izateaz ganera, beste ganerako Autonomia Erkidegoetako eta EYCAko kide diran Europako 38 herrialdeetako gazte-txartelen abantailak be badaukiez.

Gazte-txartelak 6 euroko igortze-tasa dauka eta titularrak 30 urte betetzen dauzan egunean iraungiko da.

Gazte-txartelak deskontu iraunkorrak (garraioak, ostatua, prestakuntza, kultura, kirolak, osasuna, turismoa, e.a.), lehiaketak eta zozketak, bidaia-asegurua, ikuskizunetarako sarrerak, teknologia eta askoz gehiago eskaintzen dau. Gazte-txartela aurkezteagaitik bakarrik, gazteei deskontuak eskaintzen deutsiezan 2.000tik gora establezimendu dagoz Euskal Autonomia Erkidegoan bakarrik. Ikusi hemen Euskadiko abantailak, udalerriaren edo sektorearen arabera.

Zelan lortu Gazte-Txartela?
Gazte-Txartela eskuratzea oso erraza da, hona hemen txartel hori lortzeko bidea:
Ordainketa egin ostean, astebete bi inguruko epean jasoko dozu txartela etxean.

2017/12/15

‘TRUSTLETTERS’, HIL ARGI eta ORASKA S.L. izan dira Busturialdeako IV. Enpresa Ideia Lehiaketan saritutako proiektuak


Busturialdeko IV. Enpresa Ideia Lehiaketaren sari banaketa ekitaldia burutu da gaur eguerdian Bermeoko Nestor Basterretxea aretoan. Trustletters izeneko ideiak jaso dau 3.000 euroko lehen saria eta Hil Argi ideiarentzat izan da bigarren saria, 2.000 eurokoa. Ganera, Arratzuko Elkartegian urtebeteko langunea irabazi dabe. Lehen sektoreagaz zerikusia daukan enpresa ideiarik onenaren 1.000 euroko saria, bestalde, Oraska S.L.-k eroan dau. Guztira, 15 izan dira eskualdeko ekintzaile gazteek aurkeztu dabezan enpresa ideiak, pasa dan urteko parte-hartzea bikoiztuz.

Lehenengo saria jaso dauan Trustletters erabiltze egiaztatudun posta elektronikoa da. Hau da, erabiltzaileak egiaztatu egin behar dira, euren nortasun agiria aurkeztu behar dabe. Beraz, aurrerantzean posta elektronikoa ez da anonimoa izango, igorlearen izena agertuko baita beti, egiaztatua izango baita aurretik beti. Ideiaren sortzaileak, Aritz Urriolabeitia Arrien (Muxika, 1992) eta Eneko Uriarte Román (Gasteiz, 1995) dira. Biak dira Enpresen Administrazino eta Zuzendaritzan Graduatuak.

Bigarren saria jaso dauan Hil Argi ideiak heriotza onaren eskubidearen mesedetan gizartearen beharrizanei erantzuteko proiektua izan gura dau, hileta laikoen zerbitzua, hain zuzen be. Beti be, lekuko proiektua eta bezeroekaz hartu-emon hurbilean oinarritzen dan proiektua izanik. Hil Argik hiru ildo nagusitan garatzea dauka helburu: hileta zerbitzuak, esku-hartze soziala eta ikerketa soziala eta estetikoa.

Jon Ander Urresti Ugalde (Bermeo, 1992), Aitane Goñi Landa (Meñaka, 1990) eta Maite Aizpurua Olaizola (Zumaia, 1990) gazteak dira ideiaren sortzaileak. Jon Ander Filosofian Graduatua da, Aitane Soziologian Lizentziatua eta Antropologia Sozial eta Kulturalean Lizentziatua eta Maite, barriz, Historian Lizentziatua.

Bestalde, lehen sektoreagaz zerikusia daukan enpresa ideiarik onenaren saria Oraska S.L.-k eroan dau. Oraska proiektua Errigoitin kokatutako artisau-ogi ekologikoa egingo dauan lantegia da, garia edo beste zereal batzuetatik eratorritako produktuak eskainiko dauzana. Ganera, Oraskak produktuen eskaintza zabalduko dau etorkizunean, ortuko produktu ekologikoak eskainiko baitauz. Oraskaren filosofia agroekologian oinarrituko da, hau da, produkzino prozesuan gardentasuna, ekoizle eta kontsumitzailearen arteko hurbiltasuna, biodibertsitatearen zaintza, autogestiorako gaitasuna eta elikadura-subiranotasuna.

Ideiaren sortzailea, Maddi Amezaga Arriaga (Errigoiti, 1996) da. Maddi Amezaga Nekazaritza eta Abeltzaintza Ekologikoan teknikaria da. Pasa dan urtean lehen saria irabazi eban Aldapeko Ahuntz Esnekiak ideiagaz.

Danatara, 6.000 euro banatu dira sarietan, negozio ideiok martxan jartzen laguntzeko, lehiaketaren helburuetako bat, beti be, eskualdean lanpostu barrien sorrera bermatzea dalarik.

Maitane Leizaola, BFAko Bizkaiko Behatokiko Zuzendari Nagusiak; Juan Karlos Agirre, Bermeoko Udaleko Gazteria zinegotziak; Lourdes San Severino, Gernika-Lumoko Udaleko Gazteria zinegotziak eta Urremendi Landa Garapen Elkarteko presidenteak eta Mendatako Alkateak, Joseba Mallea Lamikiz, parte hartu dabe ekitaldian, beste batzuen artean.

Busturialdeko IV. Enpresa Ideia Lehiaketa Urremendi Landa Garapen Elkarteak batzen dauzan Arratzu, Ereño, Forua, Gautegiz-Arteaga, Kortezubi, Mendata, Morga, Mundaka eta Sukarrietako udalek eta Bermeoko eta Gernika-Lumoko udaletako Gazteria Zerbitzuek jarri dabe martxan, laugarren urtez jarraian. Bere helburuak, beste batzuen artean, ekintzailetza kultura hedatzea, Busturialdean lana eta aberastasuna sortzea eta eskualdeko ekonomia sustatzea dira. Lehiaketa, Bizkaiko Foru Aldundiaren ‘Gaztedi Busturialdea’ proiektuan kokatzen da, ‘Lana bilatzea, Lana da’ programaren barruan.

Epaimahaia honako honeek osotu dabe:
  • Bermeoko Udaleko ordezkaria: Nere Mintegi Elorriaga (Behargintzako Zuzendaria).
  • Bizkaiko Foru Aldundiko ordezkaria: Aritz Kobeaga Arranz (BEAZeko teknikaria).
  • Gernika-Lumoko Udaleko ordezkaria: Joseba Irazabal Obieta (Lanbide Ekimenak-eko teknikaria).
  • HAZIko ordezkaria: Leire Zaballa.
  • Urremendi LGEko ordezkaria: Joseba Mallea Lamikiz.
Enpresa ideiak baloratzeko orduan, honako irizpide honeek kontuan hartu dira: barritzaile izaera, balio erantsia eskaintzea edota originaltasuna; enplegua sortzeko daukan potentzialidadea eta sortutako lanpostuen kalidadea; ekintzaile taldeak proiektua aurrera eroateko daukan gaitasuna; Busturialdeko eskualdean proiektu hori aurrera eroateko aukera egotea edo eskualde honetan proiektu horrek daukan egokitzapena; proiektuaren definizino-garapen maila; proiektuaren jasangarritasuna (ekonomikoki eta ingurugiroagaz) eta daukan gizarte-eragina.

2017/10/02

Busturialdeko gazteria zerbitzuek Gaztedi Busturialdearen webgunea martxan jarri dabe, eskualdeko gazteentzat


Bermeoko eta Gernika-Lumoko udaletako Gazteria zerbitzuek eta Urremendi Landa Garapen Elkarteko Gazteria zerbitzuak www.gaztedibusturialdea.eus web-orrialdea jarri dabe martxan, Bizkaiko Foru Aldundiaren 'Udal Gaztedi' programaren barruan. Horretan, Gaztedi Busturialdea proiektuan lantzen dabezan lan ildoak batzen dira.

Enplegua, bekak, prestakuntza eta ekintzailetza dira lan arlo nagusiak eta horreetan eskaintzen dabenaren informazinoa batzen da webgune barrian. Ganera, ikastaro, berbaldi edo bestelakotan izena emoteko aukera be dago bertan.

Atariak, ganera, ikastaro, hitzaldi edo bestelakotan izena emoteko izapideak be errezten dauz, aukera emoten baitau izen-emotea bertan egiteko.

2017/09/05

Bermeoko hamabost musikari gaztek "Miñen Puntiegaz" izeneko abestia sortu dabe Udalaren ‘Geuk Eus’ kanpainaren barne


Geuk Eus’ euskeraz bizitzeko 1.000 arrazoi kanpainaren barne, gure herriko musika taldeetako hamabost musikari gaztek euskeraz dantzatzeko eta abesteko "Miñen Puntiegaz" abestia sortu dabe. Zona Cero, Zartada, Etxekalte, Ozhen, Urgatz eta Ttakuntxo taldeetako musikariak eta Gatom eta Leire Gotxi dira, hain zuzen be, abesti honen egileak.

Euskeraren kale-erabileraren azken datuek dinoenez, gazteak dira euskera gitxien erabiltzen dabenak Bermeon. Holan ba, herriko musika taldeen eskutik herriarentzat abesti bat egitea erakargarria eta interesgarria izango litzatekeela pentsatu eban Udalak; bermeotar gazte sortzaileen lana ezagutarazoteko eta argira emoteko, eta, aldi berean, euskera bultzatzeko. "Miñen puntiegaz" abestia horretarako oso aproposa da, musikari, erritmo eta ekarpen asko alkartu diralako kantaren inguruan.

Abestia prestatzeko lan handia egin da eta Bermeoko Udalak Lore Barrena bermeotar gazteari aipamen berezia egin gura deutso hasikerako proposamenean buru belarri lan egin daualako. Ikusi hemen kantaren bideoklipa.

Honako hau da "Miñen puntiegaz" abestiaren letra:

Zenbat bider kruze gara
ta eguno ikusi bez,
gaurkuen emon dost
barruek ziabogie.
Erdu! Hurretu! Esan zozer belarrire!
Dxusturi perfekto baten
erantziku lotsie.

Miñen puntiegaz
mizkeku hitz osue (itsosue),
kalerik kale ibilko gara dandarrez.

Dxo sirenie… entera daidxela herri osue…

Musturrek jangotsutez
bermiotarrez!!
(birritan)

Berbak labandukuz gehidxau ezin artien,
berbak loitxukuz berandurartien.
Nireñe hurretukeran okiñ akorduen,
gau ta egun ingotsut astiro… euskerie.

Musturrek jangotsutez
bermiotarrez!!

Bermiotarrez dxangotsutez musturrek.
Okin argi: ez, da ez!
Miñe barroraino hizkuntzi ikutu arte.

Bermiotarrez dxangotsutez musturrek.
Okin argi: ez, beti da ez!
Neska zein mutil, nagusi zein gazte,
eskuek batuz euskerien alde!

Dxo sirenie… entera daidxela herri osue…

Musturrek dxangotsutez
Bermiotarrez!! (birritan)

Bermiotarrez dxangotsutez, bai musturrek!

Musturrek dxangotsutez
Bermiotarrez!! (askotan)

2017/06/01

Beharsarea Bermeoko eta Busturialdeko euskerazko lana bideratzeko Interneteko webgunea da, doakoa eta erreza



Euskeraz egiten daben tabernari, dendari, ume zaintzaile eta bestelako lanen eskaera gero eta handiagoa da gure eskualdeko herrietan. Eskaera horreri erantzuteko, Busturialdeko Gazteria eta Euskera zerbitzuek eta Behargintza Enplegu Zentroek Beharsarea.eus webguneagaz bat egin dabe.

Beharsarea.eus Bermeoko eta eskualdeko herritar guztien eskura dagoan euskerazko lana bideratzeko Interneteko web-orria da, dohainezkoa eta euskeraz egiten dan lana eskeini eta eskatzeko tresna erraz eta eraginkorra. Busturialdeko udalek eskaintzen daben zerbitzu barri honetan lan bila dabilzanak eta lana eskaintzen dabenak hartu-emonetan jartzeko bidea emoten da. Lan bila dabilzanek izena emon behar dabe atarian eta zein herritan gura daben lan egin adierazo eta beharra eskeintzen dabenek, ostera, lanaren ezaugarriak eta xehetasunak adierazoko dabez formulario baten bidez. Holan ba, alde bietako interesatuak hartu-emonetan jarri eta hortik aurrera bideratuko dabe euren lan-harremana.


Baliabide honegaz helburu bi betetzen dira: enplegua bultzatu eta euskeraren erabilera eta normalizazinoaren prozesua garatu. Beharsarea zerbitzu bat da eta erabiltzaileek baldintza bi baino ez dabez bete behar: lan-baldintza duinak eskeintzea eta beharra euskeraz egitea.

Interneteko atari honetan Beharsarea osotzen daben udalerri eta mankomunidade bakotxak bere gunea dauka, eta bakotxaren gunera sartzen garanean, jadanik argitaratuta dagozan iragarkiak ikusi daikeguz edo barriak sortu. Ganera, hasikera-orrialdetik bertatik be aukera daukagu Beharsarea osoan jendea zein lana bilatzeko argitaratu diran azken 7 iragarkiak ikusteko. 

Lanak zazpi kategoriatan sailkatuta egon arren (zaintzaileak, begiraleak, merkataritza, ostalaritza, eskola partikularrak, industria eta bestelakoak), lan-mota guztiak bideratzeko balio dau Beharsareak. Zentzu horretan, lan partzialak zein lan profesionalak eskeini eta eskatu daitekez zerbitzu honen bidez. 

2011n sortu zan Beharsarea Getxoko Euskara Zerbitzuak eta Egizu Euskara Elkarteak sustatuta. Urtez urte, gora egin dau hasikerako Beharsarea zana osotzen daben udalerri eta mankomunidadeen kopuruak: 2012an, 25 udalerri batu ziran; 2013an, 20 udalerri; eta, 2014an, 2 udalerri (Basauri eta Galdakao) eta eskualde bat (Busturialdea) batu jakozan ekimenari. Danatara, 68 udalerrik daukie erabilgarri gaur egun Beharsarea tresna. Alkarbidek -Bizkaiko Euskara Zerbitzuen Bilguneak- koordinatuta dago. 

Beraz, lana euskeraz egiteko jentea behar dabenek, edota euskalduna bazara eta lana bilatu gura dabenek, orain bidea daukie Interneten: www.beharsarea.eus.